Taibo

TAIBO é unha produción exclusiva de aCentral Folque, estreada con gran éxito no Teatro Principal de Santiago e no Teatro Colón da Coruña en maio de 2025, que propón unha viaxe musical combinando jazz, música clásica e creación contemporánea, a partir da obra do compositor Luís Taibo (Santiago de Compostela, 1889 - México, 1954), unha das personalidades máis singulares do diálogo cultural entre Galicia e México.

O espectáculo reúne a tres pianistas excepcionais —Abe Rábade, Rosalía Gómez Lasheras e Alejandro Vargas—, con amplo recoñecemento e habituais en escenarios e programacións de prestixio internacionais. A eles súmase a voz única de Antía Muíño, figura destacada da nova canción galega. Os textos das obras vocais parten de versos de Victoriano Taibo, Aurelio Aguirre e Rosalía de Castro, poñendo voz e emoción á memoria dun creador que soubo unir dous mundos.

TAIBO é unha experiencia sonora poderosa e elegante, un encontro entre tradición, emoción e vangarda que reivindica a figura dun compositor imprescindible.