A parroquia de San Xoán de Fecha atesoura unha singular estación rupestre coñecida como A Pedra que fala que, ademais do seu valor arqueolóxico, posúe unha sorprendente particularidade acústica: repite os sons que se producen na súa contorna ao reflectirse as ondas sonoras na propia pedra.

Co obxectivo de interaccionar artisticamente con este espazo tan especial naceu en 2021 O Fechiño, unha produción de aCentral Folque (Noente Paradise) realizada en colaboración coas asociacións veciñais, culturais e medioambientais da parroquia. Aquel primeiro encontro, de carácter experimental e centrado exclusivamente no patrimonio rupestre, foi denominado O Fechiño: Ano Cero.

Tras esa edición inicial, o proxecto ampliou os seus espazos de celebración dentro da parroquia e incorporou o concepto de Festival de Proximidade ao de Festival Rupestre, subtítulo que acompaña as edicións posteriores.

Hoxe, O Fechiño. Festival Rupestre e de Proximidade consolidouse como unha proposta singular dentro do panorama cultural galego. Un proxecto que se distingue por conectar á comunidade local co patrimonio rupestre da zona a través de propostas culturais próximas e sustentables que combinan música, baile, roteiros, narración oral, poesía, gastronomía e creación audiovisual.

O festival propón así unha experiencia cultural sostible, inclusiva e lúdica, pensada para ser vivida colectivamente por familias, amizades e veciñanza. Ademais, para facilitar o transporte colectivo e reducir a pegada de carbono, conta cun servizo de autobús de ida e volta desde a cidade de Santiago de Compostela.