O volume incorpora materiais de especial valor documental e emocional. Entre eles, a totalidade das letras das cancións de Narf, máis dun cento de fotografías e un diario elaborado pola súa irmá María Pérez, que acompaña as emocións e os preparativos dos días previos á súa última actuación. A través destes materiais, a memoria persoal entrelázase coa historia artística e ofrece unha aproximación íntima a un creador cuxa obra segue a dialogar co presente.

O libro complétase cun CD que reúne unha antoloxía de gravacións da súa traxectoria, moitas delas inéditas. A música ocupa así un lugar central no proxecto: non só como recordo dunha obra pasada, senón tamén como unha forma de manter viva a voz de Narf, de volver escoitar as súas composicións e de descubrir novas dimensións do seu traballo.

Fran Pérez, Narf. Canto sentido quere ser un espazo de encontro entre a memoria e a creación, entre o arquivo e a emoción, habitábel para quen compartiu a vida con Fran e para quen se achega agora á súa obra. Un libro-disco que recupera materiais, reúne afectos e contribúe a transmitir o legado dun artista fundamental.